المرة دي انا بكتب لكل الناس اللي بتكره القطط وخصوصا صحبتي شيماء (مهو انا معرفش حد بيكره القطط اوي كده الا شيماء):D
عارفين ليه الناس بتربي قطط وبتموت فيها مع انها زي ما بتقول شيماء بفروة وعندها 4 رجلين غريبة وبتتحرك كتير مع ان ده الطبيعي يعني ودي خلقة ربنا ومع انها برضه ممكن تخربش وممكن تعض وممكن تعمل حاجات تانية مستفزة اللي بيربي قطط عارف كده كويس
ولكـــــــــــــــــــــن
قطتي
_عمرها مابتفضل حد تاني عليا وطول الوقت معايا انا بس ملهاش حبايب ولا صحاب تانيين
_اول اما برجع من الشغل بلاقيها مستنياني فوق سريري ومتخرجش من الأوضة بتاعتي إلا لو انا جيت
_أما بتروح عليا نومة الصبح بتفضل تنونو وتتنطط لحد اما تصحيني عشان اروح الشغل
_لما بحطلها أكل بتفضل تمسح راسها ف رجلي كأنها بتشكرني مع ان فيه بشر كتير مبيعملوش كده
_اما بكون متضايقة بتفضل قاعدة تحت رجلي وبصالي مبتتحركش وبتفضل تنونو كأنها بتسألني مالك ومبتسبنيش إلا أما ابقي كويسة وعلي فكرة بتفهم ان كنت بقيت كويسة بجد ولا لسة زعلانة
_اما بزعق مه اي حد ف البيت بتفضل ساكتة ومتضايقة وتهز ف ديلها وبعد اما اخلص تنونو كتييييييييييييير كأنها بتقولي (ليه بتعلي صوتك مع الناس كده)
_غير مسموح لأي حشرات او صراصير او كائنات من دي إنها تقرب مني مهيا الحارس الشخصي بتاعي
_اوقات كتير بتكلم معاها (والله بتكلم معاها) ووالله العظيم بترد عليه وبتنونو كأنها فهماني
_أما ببقي تعبانة بتبقي نايمة جمبي او فوق صدري وعنيها فيها لمعة كده كأنها بتدمع
_أما كنت بذاكر كانت بتفضل قاعدة جمبي تلعب مع أنها في العادة بتلعب بعيد بتحسسني انها بتشجعني علي المذاكرة
_اما بكون بره البيت ماما بتقولي انها بتفضل قاعدة ف الشباك مستنياني
القطط علي عكس البني ادمين مش طماعين كل اللي عايزاه مننا شوية اكل وطبق ميه وطبق رمل واننا نكون حنينين معاهم وبتبقي تحت رجليك وتحبك من قلبها ودي حاجات بسيطة مش معقدة يعني
ها ياشيماء ياصديقتي العزيزة لسه مصرة علي موقفك؟
وصف بديع .. لكائن رائع صغير
ردحذفابدعتي ف الوصف تحياتي