فاكر اول مرة تقولي بحبك

(تصدق اه فاكراها .....ايه ده هو انت نسيت ......علي فكرة هزعل اوي لو كنت نسيت )

فاجابني مفكرا (لاطبعا ياحبيبي اقدر انسي اول مرة قولتلك فيها بحبك).

ثم ادار اغنيتنا المفضلة

(ف خيالي سنين رسماك دلوقتي خلاص شيفاك سمعاك وكمان لمساك لو تعرف بحس بايه هتفهمني لو تعرف لايمكن يوم تغيب عني ).

فنظرت له وانا اراقصه في شقتنا الصغيرة فكم اتمني ان اعيش عمري كله بين يديه

(يااااه الكلام ده كان من سنة كده اما كنت بشتري كتب من المكتبة وبعدين جيت انت وابتديت تتكلم مع صاحب المكتبة وانت مركز معايا اوي –علي فكرة انا كنت اصلا اصلا واخده بالي انك بتبصلي بس كنت حاسة انك غلس اوي وقلت هو بيبصلي كده ليه ههههههههههه فاكر اما خرجت من المكتبه لقيتك مستنيني انا اترعبت قلت تلاقي الواد ده مجنون وهيعمل فيا حاجة .

هو انت ساكت ليه )

وكأني قطعت حبل افكاره

(مفيش ياحبيبتي انا بسمعك وبعدين فاكر اوي البصة اللي انتي بصيتيهالي من تحت النضارة كنت حاسس انك هتقعي من طولك كأن عفريت طلع من تحت الارض وهيخطفك واما قولتلك انتي اسمك ايه ورديتي قولتيلي نعم قولتلك اصل انا بحبك وعاوز اتجوزك تنحتي شوية وسبتيني ومشيتي انا اصريت اعرف اسمك وعنوانك وجريت وراكي مع انك كنتي بتجري جري كانك بتهربي مني )

(انا كنت بهرب طبعا د ه انا كان عندي استعداد اجري ف الشارع من كتر منا مرعوبة منك واحد بيقولي اسمك ايه اصل انا بحبك وعاوز اتجوزك واول مرة يشوفني مش ده جنان )

ضحك كثيرا وهو يقول

(لا مش جنان طبعا انتي مبتسمعيش عن حب من اول نظرة وانا اول مشفتك دبت من اول نظرة )

بصراحة اخجلني جدا جدا فنظرت للارض

(يسلام انا مكنتش بصدق الكلام ده اصلا)

(لا فيه كتير اصل الحب ده ملوش مواعيد ولا بيدق بيبان هو فجأة كده وبعدين اساسا انا اول مشفتك حسيت انك نصي التاني اللي انا بدور عليه عشان كده كان لازم الحقك بسرعه قبل متضيعي مني )

(انا قبلك مكنتش حاسة اني ممكن احب ولا اتحب لاني مكنتش قد الحب )

(مفيش حد مش قد الحب كلنا قد الحب بس يبقي عندنا استعداد اننا نضحي شوية ونتمسك باللي بنحبه شوية هنستمتع بكل لحظة بنعيشها وكمان هنسعد اللي بنحبه )

(تفتكر ان الحب تضحية وبس )

(الحب تضحية ومسئولية انا قلتلك بحبك لازم اكون قد الكلمة دي لازم اكون قد اني احبك واتجوزك واكمل باقي عمري معاكي لان الحب ده عهد ووعد وارتباط بيكي لحد مموت)

(تفتكر هنفضل سوا لحد منموت)

(تفتكري انتي فيه حاجة هتمنعنا اننا نعيش سوا لحد منموت ولا انتي مش حمل مسئولية انك تحبي )

(لا قدها بس مش قد الزمن ده ممكن ف لحظة منكنش سوا)

(الزمن احنا بنقدر عليه واحنا كمان نقدر اننا نكمل سوا ونعيش سوا بس لو انتي مش هتكوني قد كلمة –بحبك_ يبقي وقتها أي حاجة ممكن تفرقنا وبسهولة اوي )

(ههههههههههههههه, طيب )

(اكتر حاجة بتعجبني فيكي عارفة ايه)

(ايه)

(مجنـــــــــــــــــــــــــــونة )

واستمرت الاغنية حتي النهاية

(متفكرش تنسي ف يوم وتبعدني اوعدني حبيبي تعيش هنا ف حضني خليني معاك علي طول قلبي المشتاق مشغول وانا مهما حبيبي اقول ده شوية عليك جوايا حنين وغرام اكبر من أي كلام لو ثانية عيوني تنام انا بحلم بيك)