امبارح كنت معدية قدام محل دباديب
وقفت شوية اتفرج عشان شكلهم حلو اوي
وكان فيه دبدوب كبير اوي لونه pink
عجبني اوي
فكرت للحظات ادخل اشتريه
بس حسيت انها بايخة ان حد يدخل يشتري لنفسه دبدوب
قلت خلاص اعمل اني هلفه لحد هدية
بس من كتر منا حاسة ببواخة الفكرة قررت اني امشي
.
.
هو الموضوع ف حد ذاته ميضايقش
بس انا مضايقة من فكرة اني معنديش حد يجيبلي دبدوب
.
.
اه انا مضايقة من فكرة اني معنديش حد يجيبلي دبدوب
واه حقيقي انا عاوزة يكون فيه حد ف حياتي يهتم بحاجاتي التافهة
ويحبها كمان
.
.
صعب جدا ان البني ادم يكون وحيد
الاصعب منها ان البني ادم يرتبط بحد وبرضه حاسس انه وحيد
والاصعب من الاتنين انك تكون متأكد انه عارف كده وبرضه
مش مهتم
فيه تفاصيل كتير بتغيب من حياتكم
يوم بعد يوم بتبتدي تبقي العلاقة روتينية
وبتقتصر الحياة علي _حبيبتي مش فاضي
حبيبتي والله نسيت
حبيبتي عندي شغل
حبيبتي قدري ظروفي
حبيبتي خمس دقايق واكلمك
حبيبتي نتكلم باليل_
والخمس دقايق بيكونوا ساعة
وباليل اما بيرجع بيكون تعبان عشان مش فاضي طول اليوم
ويدوب ينام
ويدوب تلحقي تسلمي وتطمني علي احواله
ولو كان فيه حاجة مهمة تتحكي ف خمس دقايق وخلاص
اما القضايا التافهة دي فمينفعش اصلا تتكلمي فيها
ولازم تكوني مقدرة الوضع اللي هو فيه
ولازم متبينيش انك زعلانة
ولازم الابتسامة تكون مالية وشك
مينفعش تكوني نكدية
.
.
وانتي طول الوقت حاسة انك لوحدك
لوحدك
.
.
بيكون نفسك ف حاجات صغيرة تتعمل
انه يجيبلك الحاجات الهبلة اللي انتي بتحبيها
انه مينساش حاجة انتي قايلاله عليها
او يبعتلك جواب يقولك بحبك فيه
جواب مش ايميل
من غير ميقولك ايه الجوالقديم ده
او يقولك انك فاضية اوي
او يتحجج باي حجج انتي عارفاها مسبقا
نفسك يفتكر عيد ميلادك
او حتي عيد الحب اللي الناس كلها بتعرفه
من الحاجات الحمرا اللي متعلقة ف كل الشوارع
وتحسي انك للدرجة دي مش ف قايمة اهتماماته
اللي بيخليكي مستغربة اكتر
انك كل اما تتخانقي معاه
بيفاجئك انه منفوخ منك
ويفتحلك القديم والجديد
وانك مبتحسيش بيه
ومبيديكيش فرصة حتي انك تتخانقي صح
فتضطري تسكتي
وكل مرة انتي بتسكتي
بتستغربي
وهو بيبعد.. وانتي كمان تبعدي
وتحسي انك لوحدك
لوحدك
.
.
عرفتوا ليه انا مشيت ومرضتش اشتري الدبدوب
مهو مجتش ع الدبدوب
فيه حاجات كتير صغيرة انا نفسي فيها ومبتحصلش